ORMOC CITY – Tanggong na ang lalaking nidunggab sa biktima nga nag-Zumba lang sa may plaza pasado alas sais sa buntag niadtong Agusto 17, 2025.
Naaresto ra usab siya dayon sa kapolisan pinaagi sa “hot pursuit” sa taga Ormoc City Police Station 1 (OCPS-1), og Ormoc City Police Office (OCPO) nga gipangunahan ni Police Captain Ramil C. Caldona, og PLTC Joel Camacho.
Ang akusado giila nga si alyas “Gibo,” retiradong miembro sa Philippine Constabulary, ug nagpuyo sa Kangleon St., Maraveles Compound, Brgy. Alegria, Ormoc City. Samtang ang biktima niini usa na usab ka senior citizen kinsa nakaangkon ug samad sa kiliran ug daling naka patambal sa duol nga hospital sa syudad.
Sa interbyo sa autoridad nitug-an ang suspek nga selos sa biktima ang nag-tukmod kaniya pagbuhat sa salaod. Sanglit nagtuo siya nga may relasyon ang biktima og iyang asawa kinsa kauban sa trabahuan.
Sa kuha sa Closed-Circuit Television (CCTv) footage parihong nag-Zumba niadtong higayona ang biktima ug asawa sa suspek kauban sa ubang nag-excercise sa may kilid sa Superdome, dihang kalit lang niduol ang suspek gikan sa luyo dayon duslak duha ka beses sa biktima. Hinuon luwas na ang kahimtang niini ug nakagawas na sa hospital.
Narekober sa posisyon sa suspek ang ten (10) inches nga kutsilyo ug caliber 38 revolver snub nose o “Paltik,” walay serial number pero kargado sa lima (5) ka buhing bala. Kasohan siyag Frustrated Murder ug Violation sa RA No. 10591. (Ni Josie Serseña/ EV Mail AUGUST 18-24, 2025 issue)
