BAYBAY CITY – Sa mosunod nga tolo ka tuig nga termino sa mga opisyales sa dakbayan sa Baybay ubos sa liderato ni Mayor Jose Carlos Cari e-sentro nini ang direksyon sa serbisyo sa pag-ugmad sa pamilya og edukasyon.
Kini ang mensahi niya alang sa mga prioridad atul sa Management Committee Meeting sa LGU-Baybay. Pulong pa sa Mayor, “These two pillars (Education and Family) will be our foundation moving forward, ensuring a clear direction while sustaining the valuable programs already in place for the people of Baybay.”
Gibutyag usab niya nga ang Visayas State University (VSU) maoy usa sa pinaka mahinundanong bahandi sa edukasyon, busa gidasig niya ang matag estudyanti nga makapahimulos niini nga oportunidad nga naa sa syudad sa Baybay. Pinaagi sa maayong edukasyon mas hayag usab ang ilang kaugmaon ug sa ilang pamilya. Gi-admiter usab sa Mayor ang kahimtang sa mga naa sa elementarya dili lang sa dakbayan kon dili hasta sa nasud ang gitawag nga, “functional illiterates” busa kinahanglan nilang lihokon ug pakusgon ang mga kasamtangang progama para solusyonan.
Sa laing bahin gihatagan ug gibug-aton ni Mayor Boying Cari ang “Family: Our Home,” pinaagi sa panawagan sa mga departamento alang sa mga programa nga palig-onon ang relasyon diha sa matag panimalay ug pamilya. Sanglit daghan sa giatubang nga hagit karong panahona sama sa “drug use, peace and order, and gaps in education” mahimong mapugngan kon lig-on ang pamilya ug may suporta sa usag-usa.
“Kung masugdan nato sa panimalay, dili na mahimomg problema. Our home is where we run to when we’re lost, tired, or in need. It’s where we are loved, safe, and supported,” panapos pa ni Mayor Boying Cari. Kay isip magbalantay, katungdanan sa syudad (LGU) ang maghulma og polisiya ug programa nga mahimomg tinuoray nga pinoy-anan nga limpyo, malinawon ug nag-amuma sa sunod nga henerasyon. (Ni Josie Serseña / EV Mail JULY 28-AUGUST 3, 2025 issue)
