ORMOC CITY – Girespondihan dayon sa sa taga Ormoc City Police Station 6 (OCPS-6) ug naaresto ang 55 anyos nga mag-uuma nga si alyas “Jerry” human may nag-report nga nagpagawas kini ug armas dayon pabuto didto sa Sitio Rambutan, Brgy. Patag ning syudad pasado ala una sa hapon niadtong Agusto 13, 2025.
Mga 1:30 sa hapon, dihang usa ka concerned citizen ang nagtawag sa OCPS-6 kinsa nagkanayon nga dunay gikalalis nga 22 anyos nga lalaki sa giingon nga “land-related dispute.”
Kauban sa OCPS-6 pagrespondi sa lugar ang personnel sa Ormoc City Mobile Force Company (OCMFC) ug nagpahigayon sila sa hot pursuit operation. Naabtan pa sa autoridad ang kasamok ug nakit-an ang suspek nga may nakasuksok nga armas sa iyang hawak. Giduol sa police ang lalaki ug gipangutana kon may papeles ba kini. Dihang wala siyay gikapakita, hinungdan nga gi-aresto siya.
Nakompiska sa posisyon niini ang usa (1) ka Colt .45 caliber pistol, nga may unom (6) ka “live rounds” nga bala; kauban ang black leather holster ug duha (2) ka nakabuto na nga cartridge cases. Human gipasabot sa iyang katungod, gidala na siya sa OCPS-6 ug manubag siya sa kaso kontra R.A. No. 10591 (Comprehensive Firearms and Ammunition Regulation Act) og ang Illegal Discharge of Firearm. (Ni Josie Serseña/ EV Mail AUGUST 11-17, 2025 issue)
