ORMOC CITY – Usa ka buy-bust operation ang gilunsad sa taga SDET Ormoc City Police Station 6 (OCPS-6) didto sa Brgy. Ipil, ning syudad, niadtong gabii sa Hulyo 25, 2025.
Arestado ang suspek nga si alyas, “Jun,” 32 anyos nga mekaniko ug residenti ra usab sa nahisgutang barangay. Narekober sa mga autoridad gikan sa iyang posisyon ang pito ka “heat-sealed transparent plastic sachets” nga dunay sulod nga “white crystalline substance” ug gidudahang “shabu,” ang five-hundred peso bill (PHP 500.00) nga buy-bust money, ug laing five hundred pesos (PHP 500.00) nga bogus money nga gigamit sa transaksyon.
Ang mga nakompiskang illegal nga drugas gisumiti sa Regional Forensic Unit 8 alang sa gitawag ug “qualitative and quantitative chemical analysis.”
Ang suspek human pasabta sa iyang katungod base sa Miranda Doctrine sa pinulungan nga iyang masabtan, gidala na kini sa OCPS-6. Tanggong na kini ug manubag sa paglapas sa Section 5 ug Section 11 o ang pagbaligya ug paghupot sa illegal nga drugas, o Republic Act No. 9165 (Comprehensive Dangerous Drugs Act of 2002, as amended by Republic Act No. 10640). (Ni Josie Serseña / EV Mail JULY 21-27, 2025 issue)
