ORMOC CITY – Sulod lang sa singko minutos dihang girespondihan sa taga Ormoc City Police Station 1 (OCPS-1) ang gitawag sa Hotline 911, nadakpan ang mangunguot.
Nahitabo ang insidenti sulod sa pang publikong eskwelahan sa elementarya (Ormoc City Central School) sa may Brgy. East, buntag sa Agusto 7, 2025.
Naila ang suspitsado nga si alyas “Junjun,” 44 anyos, way trabaho, ug residenti sa Brgy. Linao ning dakbayan.
Ang biktima nisumbong sa kapolisan sa OCPS-1 nga samtang naghatod siyas iyang anak, gisundan siya sa suspek ug dihang namatikdan niyang naabli na diay ang bulsa sa iyang backpack nga gikalib-ay.
Nakuha ang iyang pitaka nga may sulod nga importanting mga butang sama sa ATM Cards, PhilHealth Card, National ID, ug cash nga one thousand four hundred pesos (PHP1,400.00).
Base usab sa kuha sa CCTV naila ang dagway, ang gisul-ob sa suspek ug gisubay kini pinaagi sa “hot pursuit operation” hangtod nga didto kini naabtan sa may Lilia Avenue, Brgy. Cogon ning syudad. Boluntaryo niining gitug-an ang nahimutangan sa pitika didto rapud sa gigikanan sa may eskwelahan. Nakit-an man ang pitaka pero wala na ang kwarta kay nagasto na sa suspek. Pasakaan siya ug pagpangawat. (Ni Josie Serseña/ EV Mail AUGUST 4-10, 2025 issue)
