ISABEL, LEYTE – Niabot ug dili momenus sa onse ka gramos sa gidudahang shabu ang nakoha gikan sa dealer atul sa operasyon sa Brgy. Matlang ning lungsod, niadtong Hunyo 27, 2025 mga alas 6:58 sa sayong kagabhion.
Ang hiniusang pwersa naglangkob sa elemento sa PDEA8-Leyte Provincial Office, Isabel Municipal Police Station, og Police Drug Enforcement Group Special Operation Unit 8 Leyte Satellite. Niresulta kini sa pagkasikop sa suspitsado nga si alyas “Victor,” 48 anyos, olitaw, walay trabaho og taga Brgy. Matlang, Isabel ra usab.
Nakompiska sa maong buy-bust operation ang upat (4) ka sachets nga dunay sulod sa gidudahang shabu nga dunay gibug-aton nga 11.9 gramos kapin kon kulang ug gibana-bana nga nag-kantidad o base sa market value nga PHP80,920.00.
Nakuha usab sa autoridad gikan sa iyang posisyon ang buy-bust money nga gigamit sa poseur buyer pagpalit sa illegal nga drugas. Ang mga ebedinsya gidala sa Forensic Unit alang sa eksaminasyon. Tanggong na ang suspek sa custodial facility sa Isabel MPS ug kasohan batok sa RA No. 9165 o ang Comprehensive Dangerous Drugs Act of 2002. (Ni Josie Serseña / EV Mail June 23-29, 2025 issue)
