MATAG-OB, LEYTE – Nag-kurog ug nag-bakho sa pag-hinilak ang 36 anyos nga lalaki human masikop sa buy-bust operation nga gipahigayon sa Matag-ob Municipal Police Station (MPS) mga alas otso pasado ang takna sa gabii niadtong Agusto 31, 2025 sa Brgy. San Sebastian, lungsod sa Matag-ob.
Ang nahulog sa mga kamot sa autoridad naila nga si alyas “Enteng” dihang gidawat ang marked money gikan sa operatiba nga poseur-buyer sa illegal nga drugas. Ang pagpasiga sa lighter sa police nga nagpaka-aron ingnun nga kustomer maoy timailhan nga positibo ang transaksyon.
Wala siya magdahum nga autoridad diay ang nabaligyaan niya sa usa ka paketi sa shabu sa kantidad nga five hundred pesos (PHP500.00), diin na rekober kini sa iyang posisyon. Dihang girikisa, naka-kuha ang seizing officer ug laing unom (6) pa ka paketi sa gidudahang shabu didto sa bulsa sa “short pants” sa suspek. Nakuhaan usab siyag cellular phone, ug lighter.
Mag-atubang kini ug kaso kontra sa Sections 5 og 11, Article II sa R.A. No. 9165 (Comprehensive Dangerous Drugs Act of 2002), as amended by R.A. 10640. Namahayag ang hepe nga si Police Major Clemencio nga ang pagkasikop sa suspek maoy resulta sa mas gipalig-on pa nga kampanya sa Matag-ob MPS batok sa kriminalidad labi na ang illegal nga drugas. (Ni Josie Serseña/ EV Mail SEPTEMBER 1-7, 2025 issue)
