ALBUERA, LEYTE – Nagpabilin pang gawasnon ang suspitsado sa pagpamusil sulod sa buwangan sa Antonio B. Zaldivar Cockpit and Sports Center sa Sitio Gungab, Brgy. Poblacion, Albuera, Leyte mga alas tres kapin kon kulang sa hapon niadtong Agusto 3, 2025.
Sigun sa report sa kapolisan nga samtang nagpadayon ang sabong sa manok, usa ka lalaki ang nibunot ug armas dayon pusil sa usa ka lalaki nga nalingaw ug tan-aw sa sultada. Hinungdan nga nagkayagaw ang mga tawo sa sulod, ug naglumbaay pagdagan sa gawas sa sabungan.
Pagrespondi sa personnel sa Albuera Municipal Police Station nakita nila ang biktimang lalaki didto sa sulod nga nahagba, nagkadugo ug wala nay kinabuhi. Giila kini nga si alyas “Pong,” 47 anyos, residenti sa Brgy. Bagong Buhay, Ormoc City.
Wala nay suspitsadong naabtan ang autoridad sanglit dali kining nigawas dungan sa pagkagubot sa mga tawo ug niikyas sa wala masubay nga direksyon. Niabot sa lugar ang taga Ormoc City Forensic Unit (OCFU) aron pagproceso sa crime scene. Nagpahigayon usab dayon ug “hot pursuit operation” ang kapolisan pero pakyas silang masikop ang wala pa mailhing suspitsado.
Matud pa ang biktima kanhing miembro sa PNP ug nadistino sa dakbayan sa Ormoc apan nag-resign niadtong 2007, ug nagnegosyo isip kontratista sanglit usa kini ka lisensyadong engineer.
Niapelar ang kapolisan sa Albuera sa mga nakasaksi ug sa dunay kasayuran sa suspek nga makig tambayayong kanila sa imbistigasyon aron masabtan ang motibo ug mahatagan sa hustisya ang biktima. “Our station thoroughly understands all the details to determine the motive and achieve justice for the victim. We are thoroughly dissolving all the evidence and information,” matud pa sa hepe nga si Police Captain Bayona. (Ni Josie Serseña/ EV Mail AUGUST 4-10, 2025 issue)
