ORMOC CITY – Mismong ang mga taga Explosive Ordnance Disposal (EOD)/K9 Unit ang opisyal nga nidiklarar sa Western Leyte College of Ormoc (WLC) nga “clear and safe” batok sa hulga sa pagboto, gani walay nakita nga bomba human nagpahigayon ug “inspection and paneling operation” ang autoridad sa managlahi nga lokasyon sa tolo niini ka building.
“No explosive device or any suspicious item was found during the operation, and the premises have been secured,” sigun sa kapolisan sa Ormoc City Police Office (OCPO) nga nahibalik na sa normal ug luwas ang mga aktibidad sa nasangpit nga pribadong tunghaan.
Samtang nagpadayon ang imbistigasyon sa Regional Anti-Cybercrime Unit 8 (RACU8) aron masuta ang tinubdan sa text message sa giingong “bomb threat,” labaw sa tanan masabtan kinsa ang responsabli ug manubag sa nahitabong kaguliyang.
Ang OCPO nipaabot sa pasalamat ngadto sa publiko sa ilang kooperasyon ug kalmado nga pagrespondi, dungan sa pagtambag sa matag usa nga likayan ang gitawag nga “unverified information” nga maoy maka “panic.”
Nagsugod ang hitabo dihang mga alas 9:00 pasado sa buntag kapin kon kulang niadtong Oktobre 7 usa ka empleyado sa tunghaan ang nakadawat ug ininglis nga mensahi sa messenger nga matud pa may gitanum nga bomba sa ilang tunghaan. Human gipasabot ang kauban kalmado nilang gipagawas ang mga estudyanti. Hinuon una pa mag alas dose sa udto gipasulod na ug balik ang mga estudyanti human sa deklarasyon sa autoridad samtang ang uban naka-uli na. Ni Josie Serseña (EV Mail OCTOBER 6-12, 2025 issue)
