ORMOC CITY – Usa ka dakong “challenge” alang kang Emmanuel M. Sevilla ang paghupot sa bag-ong posisyon isip hepe sa Land Transportation Office (LTO) District Office sa dakbayan sa Ormoc; sakop niini dili lang ang Ormoc City apan hangtod niini ang boundary sa kasikbit nga lungsod sa Kananga, Albuera og Merida.
Usa ka dako ug primira klase ang dakbayan busa nagkinahanglan sad kini ug doble nga kalagsik sa pagserbisyo o pamalakad sulod ug gawas sa opisina, hilabi na pag-implementar sa balaod sa kadalanan nga maoy nag-unang mandato sa LTO.
Pamilyar siya nga personnel sa ahensya sanglit taod-taod siyang dinhi na distino una pa nahiadto sa Carigara, Leyte; ug pagka human sa unom (6) ka bulan nahibalik siya nga mao na ang mag dumala sa Distrito sa Ormoc LTO. Agi ug tubag niya kabahin sa mga nahitabong disgrasya nga gikinahanglan ang “intervention.” Gani mag-organiza unya siya ug Task Force nga pangulohan sa LTO kauban ang LGU, uban pang ahensya ug ka partner nga departamento nga may kalabutan sa trapiko.
Matud ni Sevilla nga dili man tingali ma “zero” dayon ang aksidenti o disgrasya, apan malikayan ang major nga pang hitabo sama sa makalas nga kinabuhi. Gipasabot niya nga iyang suhistyon para ilawom sa Task Force mag-establisar ug Traffic Discipline Zone, diin sa mga entrada pa lang sa hurisdiksyon sa dakbayan may makita nang karatola pagpahimatngon sa road safety, pinaagi sa pag-obserbar ug speed limit.
Gamitan usab ug speed gun, ug walay lusot ang matinumanon sa gusto ug supakero sa balaod nga mga drayber. Kay sa higayon nga maka sugat ug aksidenti kon makompirma ang kalapasan o hinungdan sa disgrasya ang sobra ka kusog mopadagan, padalhan sa LTO ug “show cause order” ang hingtungdan nga drayber o operator.
Dependi unya sa imbistigasyon ug kon dako ang perdisyon batok sa balaod automatic masuspenso o hayan kaha marebokar ang lesinysya. Kini nga mga implementasyon gikinahanglan ang kooperasyon dili lang sa mga partner sa law enforcement kon dili kinahanglan nga tabang-tabang ang publiko. (Ni Josie Serseña / EV Mail June 23-29, 2025 issue)
