ORMOC CITY – Nasikop batok sa illegal nga drugas ang upat ka lalaki pinaagi sa buy-bust operation sa Ormoc City Police Office (OCPO), ubos ni PLt. Col. Marvin C. Pedere, didto sa (Sitio Site) Brgy. Mabato ning dakbayan niadtong Hulyo 24, 2025.
Naglangkob kini sa duha (2) ka High Value Individual og duha (2) ka Street Level Invidual nga mao sila si alyas “Jesjes,” 29 anyos nga operator, residenti sa Sitio Site, Brgy. Mabato, Ormoc City (HVI); alyas “Titing,” 31 anyos nga construction worker, residenti sa Sitio Palinpinon, Brgy. Margen, Ormoc City (HVI); alyas “Lyn,” 32 anyos nga store helper, residenti sa Brgy. Labrador, Ormoc City (SLI); og alyas “Milay,” 20 anyos, walay trabaho, ug residenti sa Brgy. Caridad, Baybay City.
Ang operasyon resulta sa hiniusang pwersa usab sa Ormoc City Drug Enforcement Unit (CDEU) kauban ang Regional Drug Enforcement Unit, Ormoc City Intelligence Unit Ormoc City Police Station 3 (OCPS-3), Philippine Drug Enforcement Group-SOU8 og Regional Intelligence Unit 8.
Sigun sa police report nakuha sa posisyon ni alyas “Jesjes” ang “thirty-six (36) pieces of heat-sealed transparent plastic sachet containing white crystalline substance suspected to be shabu;” ingon man ang usa (1) ka “genuine subscribed” five-hundred peso bill (PHP 500.00) nga buy-bust money, siyam (9) ka tag one-thousand peso bills (PHP1,000.00) nga bogus money, usa (1) ka five-hundred peso bill (PHP500.00) nga bogus money, usa (1) ka caliber .45 pistol ug magazine niini nga dunay, napolo (10) ka bala, usa (1) ka granada, usa (1) ka roll sa aluminum foil, tolo (3) ka lighter, ug duha (2) ka aluminum foil strips.
Samtang nakuha sa posisyon ni alyas “Titing” ang tolo (3) ka paketi sa gidudahang shabu. Nakuhaan usab sa iyang posisyon si alyas “Milay” ug duha (2) ka paketi sa gidudahang shabu.
Human sila gibasahan sa ilang mga katungod diha sa Miranda Doctrine, gidala na sila sa OCPS-3 diin sila gikustodiya. Ang mga suspitsado mag-atubang og kaso kontra sa Republic Act No. 9165, o ang Comprehensive Dangerous Drugs Act of 2002, ingon man ang Republic Act No. 10591, o Comprehensive Firearms and Ammunition Regulation Act. (Ni Josie Serseña / EV Mail JULY 21-27, 2025 issue)
