MATAG-OB, LEYTE – Arestado ang usa ka timekeeper sa konstruksyon tungod sa kalambigitan sa illegal nga drugas.
Naglunsad ug buy-bust operation ang Matag-ob Municipal Police Station, sa pangunguna ni Police Major Clemencio, Chief of Police, buntag sa Hulyo 26, 2025 didto sa Brgy. Riverside, Matag-ob, Leyte.
Giila ang suspek sa alyas nga “Weng” kinsa walo na ka tuig nga nagtrabaho sa kompaniya. Nasikop siya human modawat sa “marked money” gikan sa poseur buyer nga operatiba kinsa nagpaka-arong ingnun nga kustomer.
Narekober gikan sa iyang posisyon ang usa ka paketing shabu ug ang ginamit sa transaksyon nga five hundred pesos (PHP500.00) nga marked money sa operasyon. Dihang girikisa ang iyang lawas, nakuha sa bulsa sa iyang karsones ang unom ka paketi sa gidudahang shabu.
Mag-atubang ang suspek sa kasong paglapas sa Sections 5 og 11 sa Article II sa Republic Act No. 9165, o ang Comprehensive Dangerous Drugs Act of 2002. Human gipa-ilawom sa inquest proceeding, nagpabilin kini karon sa kustodiya sa Matag-ob Municipal Police Station.
Gipasalig sa kapolisan sa lungsod nga magpadayon ang ilang kampanya kontra ilegal na droga, isip kabahin sa katuyoan nga magpabiling luwas ug dunay seguridad sa mga barangay sa lungsod. (Ni Josie Serseña / EV Mail JULY 28-AUGUST 3, 2025 issue)
