Dear Atty. Golo,
Kadtong nag post hugaw ang baybayon duol sa pantalan nga ang mosakay og barko pabayron og “environmental fee,” nahadlok kay ipatawag kono sa “session” sa “sanggunian” sa Hilongos. Gipakauwawan pod siya sa “announcer” nga tuga-tuga og adto sa Cebu di man kabayad og PHP 20. Unya, giingnan siya dili na paagi-on sa Hilongos kay iya gipakauwawan unya gipasanginlan nangurakot ang mga opisyal. Di man siya ang namasangil, ang nag comment man. Pagarpar ang “announcer,” sipsip pa jud. Di na diay ta ka reklamo? Kon di motambong sa “session” pwede? Unsa may insakto?
Apil og reklamo,
Simo
Dear Simo,
Katungod sa katawhan ang pagpadayag sa gibati, apil ang pag reklamo sa governo (Art. III, Sec. 4, 1987 Constitution). Di angay mahadlok moatubang sa “session” kay buotan ang mga opisyal sa Hilongos. Kon “busy,” pwede dili mo “attend.” Ang “sanggunian” pwede adto pod mag “session” sa pantalan, unya inig human, ilang limpyohan ang baybayon. Ipakita sa “facebook live” nga nasulbad ang problema. Mo report pod ang “treasurer” pila ang nakolekta og giunsa pag gasto. Makontento ang mga tawo, di na mo reklamo. Inig bayad sa “environmental fee” mokoot og bayente, magngisi.
Imong amigo,
Manny G. Golo (EV Mail Jan. 29-Feb. 4, 2024 issue)
