Dear Atty. Golo,
Ngano Feb. 24 man ang EDSA, di ba Feb. 25? Sayang, way “hearing” ang mga Korte. Basahan na unta sa decision ang ako bana. Gikiha si Pedro og “theft” kay gikawat kono niya ang kabaw. Wa may sala ako bana. Pisi ra may iya gikawat. Mikuyog man ang kabaw, ang-ang og balibaran. Di man tinood nang Edsa. Si Cory “illegal” nga Presidente. Kon nalagpot si Marcos, ang mopuli si Tolentino unta kay siya may Vice President niadto, di ba? Dili tinood ang “people power.” Nailad ang mga tawo sa una kay wa may social media. Karon di na kay ang “trolls” mo depensa.
Dili pailad, Bikad
Dear Biks,
Gipermahan ni PBBM ang Proc. 167 pagsaulog sa EDSA sa Feb. 24 karong tuiga. Kini pinasikad sa “holiday economics” aron mataas-taas ang “weekend” sa katawhan. Peru looy pod ang imo bana og ubang mga detenado kay mataas-taas ang ila pagkapriso. Tinood ang EDSA. Ang Korte Suprema mihukom nga “legitimate” ang paglingkod ni Cory isip Presidente human gipalagpot sa “People Power” si Ferdie niadtong Feb. 25, 1986 (G.R. No. No.73748). Tinood ang “People Power.” Ang estorya nga pisi ra ang gikawat, maoy di tinood. “Style” na sa “trolls.”
Imong amigo, Manny G. Golo (EV Mail Feb. 20-26, 2023 issue)
