Dear Atty. Golo,
Ngano di man “holiday” sa Southern Leyte niadtong Oct. 20 nga “Leyte Landing” man. Di ba ang Southern Leyte sakop man sa Leyte? Nakapalit lagi ko og nilata unya “expire” na man diay. Ako untang iuli peru naa man nakasuwat nga “no return, no exchange” dili na pwede iuli? Kining akong bana, perti nakong lipata. Abe nako’g buotan kay sa uyab pa me siya juy moda sa akong bag. Peru, paghuman namo og kasal, hinggawas ang tinood. Perting tapulana, dako ra ba’g ka-on. Nagsalig sa ako sweldo. Teacher diay ko. Ang ako bana suki nako og drive sa “habal-habal” sa una. Pwede, ako iuli ang ako bana sa ilaha?
Imong amiga, Ma’am Julia
Dear Ma’am Juls,
Sa una, usa lang ang Leyte. Apan niadtong 1960, giduha ang Leyte. Ang bag-ong nahimo nga probinsya mao ang “Southern Leyte.” Gunad niadto, ang Southern Leyte lahi na sa Leyte. Mao nga ang Oct. 20 nga holiday, para lang sa Leyte, way nay apil ang “Southern Leyte.” Ang “No return, No exchange” wala itugot sa balaod (RA 7394). Dunay katungod ang “consumer” pag-uli sa mga pinalit nga depektoso sama nianang “expired” na. Peru, dili pwede iuli ang bana o asawa kay “No return, No exchange” nang inyoha. “Till death do us part” ang inyo saad. Agwantaha lang, mabootan lagi na imo bana kon himatyon na.
Imong amigo, Manny G. Golo (EV Mail October 17-23, 2022 issue)
