Dear Atty. Golo,
Nganong “holiday” man ang Aug. 21, pasidungog kono ni Ninoy Aquino nga kumunista man to si Ninoy. Nakakita jud ko sa Youtube. Kon wa pa to mamatay si Ninoy, kumunista na unta ta. Diha man gani post sa PNP nga kumunista si Ninoy. Motoo jud ko sa PNP kay kontra gud na sila sa kumunista. Ang PNP guy nagdakop ni Ninoy. Unsa may kalainan sa police og army? Di ba mga army man ang nagpriso ni Ninoy kay na konvicto man siya. Hasta ang mga army miingon man nga kumunista si Ninoy. Mora ang ako lang ugangan ang belib ni Ninoy. Dali ra man gud ako ugangan ilaron, liwat sa ako bana.
Lagot sa kumunista, Prescila
Dear Prescila,
Aug. 21, matag tuig gideklarar nga Ninoy Aquino’s Day (RA 9256). Ang maong balaod gipasar sa kongreso og giaprobahan ni Presidente GMA. Mga pinili sa katawhan ang naghimo niining balaora. Ambot ang blogger sa Youtube kinsa ang nagpili niya. Si Ninoy gipatay niadtong 1983. Sa wa pa patya, gi priso si Ninoy. Karon, 39 na ka tuig gikan siya gipatay, gilibak na pod. Dunay nagsabwag og bakak nga balita, apil ang PNP, dili Philippine National Police kon dili Pulos Na Pekingnews, og sa Army, dili Philippine Army kon dili Trolls Army. Dili kumunista si Ninoy. Wa mailad ang imo ugangan. Siya ang nailad nimo.
Imong amigo, Manny G. Golo (EV Mail August 22-28, 2022 issue)
