Dear Atty. Golo,
Tinood, ang nahagbong sa “board exam” sa Nursing hatagan kono og “temporary permit” aron maka trabaho? Peru, nganong ang nag grado ra man gikan 70 – 74 ang tagaan? Kon ang 74 balihon, 47, hagbong gihapon. Maayo pa 69 kay kon balihon, 96. Maayo pod unta apil ang pulis. Ang ako anak nahagbong sa “examine” sa pulis, peru “bright” manokhang. Ang iya uyab 15 anyos, namabdos kay gitukhang ni Junior. Ila ra ba kono ikiha si Junior ug “rape,” pwede diay nga uyab man sila? Na problema ko ni Junior… Wa pay trabaho, dako ra ba’g kaon. Magool ko kon si Junior ma priso…
Tambag please,
Maritess
Dear Marit,
“Proposal” pa sa Secretary sa Department of Health nga ang mga “nurses” nga nahagbong sa “board exam” hatagan og “temporary permit” aron maka trabaho. Kini aron masulbad ang pagnihit sa mga nurses sa atong nasud karon. Daghan ang okey. Duna poy misupak. Bahin ni Junior, kon wa pa moabot og 16 anyos ang iya uyab, unya gilabtan niya, pwede siya makasuhan og “statutory rape”(RA 11648). Mao nga tambagi si Junior aron di na manukhang. Maningkamot siya og magtinarong kay dako raba siya og kaon. Ayaw lang kaayo kagool kon si Junior ma priso, kay ang ka-on libre man didto.
Imong amigo,
Manny G. Golo (EV Mail June 19-25, 2023 issue)
