Dear Atty. Golo,
Naunsa ba sige man “increase” ang gasolina. Mo “roll back” kausa, mo “increase” kalima. Mahal tanan. Ang sweldo barato. Moasenso pa kaha ta? Ang ako ugangan sige lang pamantay. Masuko kon mangayo ko og bugas. Unsa iya gusto, mangawat ko. Sige kasuko kay alkanse kono iya anak kay maestra, samtang ako habal-habal driver lang. Hait kaayo sinultihan. Dili makaon og iro. Modagan lang tingali ko og konsehal sa barangay pohon. Maayo na lang naay “honorarium.” Manghatag ko tag PHP 50.00 daog na kaha? Ang kuyaw kon koprason. Mausab pa kaha ang kurapsyon sa ato governo?
Nagsunod kanimo,
Geronimo
Dear Gerry,
Ang mga “oil company” pwede magpa “increase” sa presyo sa lana nga dili mananghid sa governo, tungod sa “Oil Deregulation Law” (RA 8479). Ang tumong unta sa balaod nga pasagdan ang mga negosyante sa gasolina nga magkompetensya aron mobarato. Ang nahitabo, nagkompetensya pagpamahal sa presyo. Ayaw kasuko sa imo ugangan kay gusto lang siya maningkamot ka. Karon, ang iya sinultihan dili makaon og iro. Basin sunod tuig, makaon na og iring. Kon gusto ka magkonsehal, ayaw pamalit og boto. Maundaang lagi ang pangurakot sa governo og kini magsugod ni diha nimo.
Imong amigo,
Manny G. Golo (EV Mail July 31-August 6, 2023 issue)
