Dear Atty. Golo,
Mabdos ko, 6 ka buwan. Unya, gibiyaan ko sa ako uyab. Way puangod to si Junior. Arang paita. Mora ko nadat-ogan sa kalibutan. Suko kaayo si Tatay kay wa ko pato-o niya. Wa na kono koy tahud niya nga nagpadako sa akong bukog. Milayas ko. Moinom unta ko og gatas aron malagsik ko inig panganak, mahal man. Diha nag-ingon nga maka “discount” kono ko kay “solo parent.” Matawag diay ko og “solo parent” wa pa man matawo ang bata? Gusto na ko maghikog.
Nagsolo-solo na lang, Pilang
Dear Pilang,
Gipalapdan na ang benepisyo sa mga “solo parent.” Apil na ang mabdos nga nagsolo-solo, pareha nimo (Sec. 4, par. f, RA 11861). Ayaw paghuna-huna anang hikog kay “bad” kana. Pakatawha ang bata. Kon naa na siya, malingaw lagi ka. Mawa tanan nimo problema. Kana si Junior nga mibiya nimo, magmahay na siya. Mentras tanto, uli sa inyo. Pangayo pasaylo ni Tatay nimo. Love ka ni Tatay nimo. Malipay pod siya pohon makakita sa iya apo. Sa iya kalipay, hatagan lagi ka ni Tatay nimo og gatas nga sinako.
Imong amigo, Manny G. Golo (EV Mail January 23-29, 2023 issue)
