Dear Atty. Golo,
Looya sa Gilas oi, napildi sa tune up game didto sa Europa. Unsaon pagdaog sa FIBA? Sunod buwan na ra ba. Maayo unta makaduwa si Kai Sotto og Jordan Clarkson. Kon di sila kaduwa, samot way dag-anan. Lupig diay ang player sa politico. Ang politico way pildi-pildi. Kay paliton man ang botante. Madayon ang eleksyon sa kapitan? Nus-a gani to? Modagan unta ko kay ang amo kapitan sige og “travel.” Kon may seminar, adto sa Boracay kay di kono masabtan ang “module” kon anhi ra sa ato. Kon mga politico ang atong paduwaon, seguro daog kay ilang paliton ang referee, he..he..
Umaabot Kapitan,
Tristan
Dear Tristan,
Segun sa balaod (RA11935 ), ang Brgy. og SK elections ipahigayon sa katapusang Lunes sa Oktobre karong tuiga, o inig ka Oct. 30, pohon, kon di ma postpone. Sa basketball, lingin ang bola. Kon ang Gilas pildi karon, aron modaog, ang ila practice angay doblehon. Lahi ang sports sa politika. Ang atong piniliay gihimong pinalitay. Kay ganahan man ka mo molakaw, ang angay nimo apilan, “walkathon.” Maayo kay gusto ka modaog ang Gilas-Pilipinas. Ang mga politico, sila ra juy modaog. Kon ang atong player mga politico, di papuli, di mopasa, pildi gihapon ta kay buaya, ha..ha..
Imong amigo,
Manny G. Golo (EV Mail July 17-23, 2023 issue)
