Dear Atty. Golo,
Nagool ko namatay si Jovit. Pagka “champion” niya sa Pilipinas Got Talent, ang iya gikanta “Too Much Love Will Kill You.” Makapatay lagi ning hingsobrahan sa gugma. Insakto jud wa ko mahigugma sa una. Karon, 61 na ako edad. Namisita ko sa ako gipanguyaban nga “G.R.O” di man ko hatagan og lugar sa akong karibal nga mga batan-on. Di ba ang mga “seniors” ang paunahon pagpamisita? Naa man gani “express lane.” Mentras tanto, di na ko mokanta bahin og gugma, kana na lang kumedya, pareha sa awit ni Max Surban nga Nabali ang Christmas Tree.
Hadlok mamatay, Tonyay
Dear Tonyay,
Si Jovit namatay dili tungod sa “love songs” kon dili tungod sa sakit. Atong i-ampo ang iyang kalag. Dili tinood nga ang sobrang gugma makapatay. Ang way gugma hinoon maoy perming sapoton. Sa laing bahin, ang tawong puno sa gugma kanunayng malipayon. Bahin sa “express lane” sa mga seniors, anha ra na sa mga opisina sa governo o “commercial establishment” (RA 9994). Way “express lane” sa panguyab. Aron di na ka molinya, e “text” na lang imong “love u.” Aron pod ka ma “excited”, pwede maminaw sa kanta ni Jose Mari Chan nga Christmas In Our Hearts.
Malipayong Pasko, Manny G. Golo (EV Mail December 12-18, 2022 issue)
