Dear Atty. Golo,
Nailhan na kono ang “mastermind” pagpatay ni Percy Lapid? Ig-unsa man si Percy Lapid ni Lito Lapid, igsoon? Asa may dako og silot ang “mastermind” o ang “gunman.” Pag “stampede” sa Korea nga daghan ang namatay, nangayo og pasaylo ang mga opisyal didto. Peru dinhi sa ato, way moangkon, magtud-tud lang. Ang Secretary pod sa DOJ, wa mo “resign” bisan ang iya anak nadakpan og marijuana. Ngano ang atong mga opisyal wa may uwaw? Inig eleksyon, dagko ang panghatag. Dawaton pod sa mga tawo kay grasya man. May pag-asa pa kaha ang Pilipinas nga bisan sa Paeng ang PAG-ASA wa man ka “warning?”
Imong tigsunod, Eking
Dear Eks,
Si Percy Lapid dili igsoon ni Lito Lapid. Ang tinood ngan ni Percy Lapid mao si Percival Mabasa. Ang “mastermind” og ang “gunman” parehas og tulobagon kay sila pareha nga “principal by induction and direct participation”(Art. 17, RPC). Ang kwarta nga halin sa boto dili grasya kon dili disgrasya. Inig daug sa politico nga namalit og boto, “landslide” ang iya labaw. Happy ang mga “illegal loggers” nga siya ang padrino. “Unli” ang pamutol sa kahoy. Ang PAG-ASA igo lang mo “warning.” Naa tay pag-asa. Ang ato pag-asa wa sa PAG-ASA kon dili naa nato matag-usa, nga di na nato iboto ang politico nga mamalit og boto.
Imong amigo, Manny G. Golo (EV Mail October 31-November 6, 2022 issue)
