Dear Atty. Golo,
Tinood nagpakasal ang Miss Puerto Rico og ang Miss Argentina? Puro sila babaye, puro pod gwapa. Wa diay gwapo didto sa ila? Dinhi sa ato, jutay ray gwapa, mga estrikta ra ba. Na “frustrated” ko nga wa makauyab og gwapa, mao nangita na lang ko og gwapo. Ako na unta buwagan si Pedro, peru dako na ko og gasto. Okey man pod tingali kon laki-laki ang mag-ipon aron wa’y away. Ang babaye gud, dako og baba. Kon ang laki parisan og baye, sige og away. Naa bay libre kasal inig ka Valentines? Wa lagi me “budget” pakaon mao huwat lang me og kasal nga “free.” Kuhaon ka namong Ninong, ha…
Nagsunod nimo, Calixto
Dear Calix,
Segun sa balita, nagpakasal ang manag-uyab nga sila si Miss Puerto Rico og Miss Argentina. Puro sila naka-apil sa Miss Grand International. Legal ang “same sex marriage” sa ilaha. Peru dinhi sa atoa, dili kana mahimo. Ang atong balaod nagmando nga ang kaslon mao lang ang babaye og lalaki (Sec. 1, Family Code). Ang tumong sa kaminyoon mao man ang pagtukod og pamilya. Dili kalikayan nga mag-away ang magtiayon. Ang importante, maantigo silang mopasaylo og mosabot sa usa’g usa. Di pod tinood nga dili mag-away ang puro’s laki. Mag “boxing” man gani. Kuyaw pa jud og mag “fencing.”
Ninong puhon, Manny G. Golo (EV Mail Feb. 6-12, 2023 issue)
