Dear Atty. Golo,
Natawo ko “leap year.” Ako birthday, Feb. 29, 2006. Gunad niadto, ka lima pa ko nag “birthday,” pag 2008, 2012, 2016, 2020 og karon 2024. Ika unom nahong birthday, sa Feb. 29, 2028 pa. Nagsogod na kono ang “registration” sa Comelec, pwede na ko mag pa rehistro? 18 na diay ko nga ka lima pa man ko nag “birthday?” Pwede man kaha magpa rehistro anha sa “mall,” tinood? Maayo unta inig eleksyon anha pod sa “mall” aron mag “shopping” dayon inig dawat sa PHP1,000.00 kay dagko man kono og pinalitay inig 2025. Daghan malipay. Maayo ang eleksyon adto sa “mall” aron “memorable.”
Mahal nako ang Pilipinas,
Jonas
Dear Jonas,
Ang Comelec nagsugod na sa “registration” sa mga bag-ong botante karong umaabot nga 2025 election. Gisugdan sa Feb. 12 karong tuiga og mahuman sa Sept. 30 sunod tuig pohon. Dunay pang rehistro sa 170 ka mga “malls.” Mao ni gitawag og RAP kon “Register Anywhere Program.” Pwede na ka magpa rehistro kay 18 na ka (Art. V, Sec. 1, 1987 Constitution). Ayaw paghuna-huna nga 5 pa ka kay maru na ka. Nagplano gani ka pag baligya sa imong boto og PHP10000. Kon imo nang buhaton, imo gibaligya ang Pilipinas sa demonyo. Maayo pa ang eleksyon adto sa sementeryo, aron “meaningful.”
Imong amigo,
Manny G. Golo (EV Mail Feb. 26-March 3, 2024 issue)
