Dear Atty. Golo,
Nagool ko kay hapit na molapas sa kalendaryo ako edad, wa pa ko’y anak. Gusto unta ko makaanak aron naa ko liwat. Unsaon, wa pa man ko’y bana. Pwede man tingali makaanak bisan way bana. Nakadungog ko nga dunay nanganak pinaagi sa “surrogacy,” unsa man na? Unsa may binisaya sa “surrogacy,” suroy-suroy? Aw, makaanak jud basta sige og suroy. Peru lain man kaha ang momabdos. Inig rehistro sa bata, kinsa man ang inahan, ang nagpamabdos o nag-utong? Makaanak gani ko og laki, nganlan nako og Denver. Kon babaye, nganlan og Sixers. Kon bayot, Boston.
Kaanakon,
Sharon
Dear Sharon,
Ang “surrogacy” mao ang binag-o nga paagi sa pagpanganak diin lain nga babaye ang momabdos sa bata nga gikan sa lain nga babaye. Ang momabdos gitawag og “surrogate” kon puli nga inahan kay siya man ang mo-utong peru dili siya ang tinood nga inahan. Toa ni sa laing nasud. Ambot kon duna ba ni sa ato. May mga Pilipino mihimo niini didto sa gawas. Dako ni og gasto. Ang atong balaod, RA 3757 kon “Civil Registry Law” wa mag-apil sa “surrogacy.” Lisod ang imo plano mahitabo kay anak man ang imo unahon bahala og way bana. Unaha ang bana, makaanak lagi ka og lima.
Imong amigo, Manny G. Golo (EV Mail May 1-7, 2023 issue)
