ORMOC CITY – Nag tulo-tulo pa ang dugo sa lawas sa biktima dihang girespondihan sa Ormoc City Fire Station Emergency Medical Services team didto sa korner sa Mabini og Aviles Street (atubangan sa J&F Mall) niadtong Junyo 7 mga alas 10:15 sa buntag.
Ang lalaki nailhan nga usa ka Rolito Omega y Ihada, 58 anyos, taga Brgy. San Pablo ning syudad. Naka angkon kini og samad sa ulo, nawong, braso ug tiyan.
Ang suspek mao si Rico Pelayo y Opeña, 49 anyos, residenti sa Tzu Chi Village, Brgy. Liloan ning syudad. Naaresto siya sa taga Mobile Patrol Unit kinsa nakakuha sa sundang nga gigamit sa krimen, nga nabulit pa usab sa dugo.
Nag init ang lalisay sa duruha tungod sa pag ilog sa pasahero, sanglit pulos sila mga tricycle diver nga nag biyahian sa dakbayan.
Sa imbistigasyon sa kapolisan nga nag lalis una ang duha diin kalit nikuha ang suspek og sundang didto sa iyang tricycle. Naka bantay ang biktima og nidagan kini paingon sa mall, apan nadam-ag siya hinungdan nga naabtan siya sa suspek.
Ning higayona sunod sunod na ang pagtigbas sa suspek ngadto sa biktima. Nadala si Omega sa tambalanan diin nasayran nga luwas na ang kahimtang og nag paayo na sa samad. Samtang giditiner na sa Police Station-1 si Pelayo ug giandam na ang kaso batok kaniya. Ni Josie Sersena (EV Mail June 5-11, 2023 issue)
