BAYBAY CITY – Usa na usab ka kaso sa pag pamosil ang nahitabo diin usa ka lalaking biktima ang namatay.
Sigun sa report sa Baybay City Police Station (BCPS) nga nianang mga alas 8:45 P.M. kapin kon kulang sa Marso 5, naka dawat sila ug tawag gikan sa concerned citizen nga nagpa sabot sa shooting incident didto sa Brgy. Ciabu ning syudad. Human makuha ang impormasyon girespondihan nila kini dayon sa ilang personnel nga gipangunahan ni PSSg Lucino Torrenueva.
Pag abot sa lugar ug nakompirma ang insidenti gi kordon dayon sa kapolisan ang lugar nga nahitaboan ug gitawagan ang imbistigador. Sa gihimo nilang paki susi sa mga naka saksi, matud pa nanihapon ang biktima sulod sa ilang balay dihang kalit lang miabot ang duha (2) ka wa mailhing mga suspitsado. Ang usa (1) naka black jacket ug naka karsones, dunay gitas-on nga 5’8” samtang ang usa pa ka suspek naka brown sweatshirt.
Dugang pa nga abli ang gate sa hinungdan nga sayon rang naka sulod ang mga kriminal. Diritsong gi puntirya ang biktima, ug bisan paman sa iyang pag lihay naigo gyud ang iyang ulo. Human nilampos sa ilang tuyo, dali nga niikyas ang mga suspitsado biya sa lugar.
Nag pahigayon dayon ug “hot pursuit operation” ang kapolisan sa Baybay City alang sa pag dakop sa duha ka lalaking suspek pero wala kini masakpi.
Gi proceso usab ang crime scene pinaagi sa taga Leyte Provincial Forensic Unit, ug gihimo pod ang Autopsy Examination sa patayng lawas sa biktima.
Si PLTCOL Aljohn Teddy R. Llanes, ang Chief of Police, higpit nga gi kondena ang krimen, uban sa pag awhag sa katawhan nga makanunayong alerto ug ikmat sa palibot hilabi na ug dunay katingad-an ug mga lihok nga personalidad.
Gidasig usab sa BCPS nga e report ang unsamang impormasyon ug mga insidenti sa lugar pinaagi sa pag kontak sa ilang Hotline Number nga 0998-508-6456. Ni Josie Serseña (EV Mail March 4-10, 2024 issue)
