ORMOC CITY – Ubay ubay nga establishimiento ug sagad mga balay ang naugdaw sa nahitabong sunog nga nag sugod kapin kon kulang alas siete ang (7:00PM) takna sa gabii sa Pebrero 22, didto sa Purok Chrysanthemum, Brgy. Cogon ning dakbayan.
Sa inisyal nga imbestigasyon sa Bureau of Fire Protectioon (BFP) dunay 43 ka residential establishimiento ang naangin sa trahedya.
Sigun sa report nadawat sa bombero ubos ni FCINSP Darren P. Baclean, City Fire Marshall, ang fire alarm mga alas 7:32PM. Dali nga naka respondi ang bombero sa syudad ug ang fourteen (14) ka fire trucks apil ang sa silingan nga lugar sama sa Baybay City, Merida, Kananga, Albuera, Palompon, Tzu Chi Fire Brigade, PASAR sa Isabel, ug LR-Tongonan, ug uban pa.
Kombinasyon sa Interior ug Exterior nga pag atake ang gigamit nga systema sa BFP pag kontrolar sa kayo. Gibutyag nga niabot sa third alarm status ang nahisgutang sunog. Ug pinaagi sa Ground Commander nga si FCINSP Baclean nag diklara ang BFP-Ormoc City Fire Station (BFP-OCFS) ug fire out pagka alas 10:25PM. Ug duna lay usa ka biktima nga civilian ang na injured.
Apan nibalik pag silaob ang kalayo pagka alas siete pasado sa buntag; diin dali pod nga girespondihan sa mga mga bombero sa syudad aron ma likay ang dugang pag kaylap sa kalayo. Kasamtangan pang nag pahigayon ug dugang imbistigasyon ang BFP-OCFS aron pag suta kon unsay hinungdan sa sunog ug pila ang kinatibok-ang danyos.
Hinuon gi kompirma nila nga walay kinabuhi nga nakalas. May pipila ka kasong medical nga narispondihan sa naka standby nga rescue teams sama sa nag lisod pag ginhawa ug nasamad.
Wala usab maglangan ang opisyales sa Brgy. Cogon sa pag panguna ni Hon. Danda Codilla nga pamahamutang ang mga nasunogan didto sa Cogon Gym.
Pagka buntag sa Pebrero 23, naabtan sa EV Mail ang mga personnel sa City Social Welfare Department (CSWD) ug City Health Office (CHO) nga nag atiman sa mga namakwit. Didto pod personnel sa Department of Labor and Employment (DOLE) og Tingog Partylist, ingon man si SBM Caren Rama og Board Member Vince Rama, nga nag susi sa panginahanglanon sa mga biktima aron ma proceso ang dugang ika tabang sa gobierno. Nidangat usab sa kasamtangang Evacuation Center ang mga nag ka lain laing ahensya sama sa Red Cross, Tzu Chi Foundation ug mga pribadong grupo aron pag tabang sa mga biktima.
Sa kinatibok-an gipasalamatan sa BFP ang LGU sa liderato ni Mayor Lucy Torres Gomez alang sa koordinasyon sa ubang pwersa sa “responding units and volunteers” diin nahimong han-ay ang gihimong firefighting operation. Ni Josie Sersena (EV Mail Feb. 19-25, 2024 issue)
