ORMOC CITY – Giingong lango sa ilimnong maka hubog ang naka pa pukaw sa karaan nang kayugot sa anak ngadto sa iyang kaugalingong amahan, hinungdan sa sinugdanan sa ilang panaglalisay.
Mismong ang anak maoy nikotlo sa kinabuhi sa iyang amahan. Ang insidenti nahitabo sa may Purok Camia, Brgy. Guintiguian ning dakbayan mag alas siete ang takna sa gabii (6:50 P.M.) niadtong Pebrero 25.
Ang biktima mao si Vicente Ramirez, Jr., 50 anyos, mag-uuma ug nagpuyo sa Sitio Panoma, Brgy. Guintiguian, Ormoc City. Ug ang suspitsado giila nga si Junrey Ramirez, 28 anyos, kamagwangan nga anak sa biktima, nga nag puyo sa Purok Camia sa nahisgutang barangay.
Matod pa nag inum ang amahan og anak, o ang biktima ug ang suspek, hangtod nga nahisgutan ang nasinati sa batan-ong Ramirez sa kamot sa iyang amahan sa iyang kabata-on, nga bisan dihang bata pa siya kanunay siyang bun-ogon niini.
Nagka initay ang ilang lalis hangtod nga nikuha ang anak ug mahait nga hinagiban (kutsilyo) dayon dunggab sa iyang amahan. Naigo kini sa dughan hinungdan sa hinanali nga kamatayon sa biktima. Sumala sa mga silingan nga naka saksi sa panghitabo, hayan nahuwasan ug kalit ang suspek sa iyang nahimo batok sa iyang amahan, apan uwahi na kay wala na kini kinabuhi samtang dad-on na unta sa tambalanan.
Tanggong na sa custodial facility sa Ormoc City Police Station 2 (PS-2) ang suspek nga si Junrey Ramirez. Samtang giandam ang atubangon nga asunto batok sa iyang nahimo ngadto sa kaugalingong amahan.
Mag basol man siya, uwahi na ug dili na mabalik ang kinabuhi sa iyang amahan bisan kanus-a. Ni Josie Sersena (EV Mail Feb. 26-March 3, 2024 issue)
