ORMOC CITY – Patay diha diha dayon ang usa ka babaying ukay-ukay vendor dihang giposil sulod sa iyang kwarto, pag ka human usa ka lalaki ang nakuhaan og illegal nga drogas sulod sa panimalay sa biktima.
Ang insidenti nahitabo sa may Juan Luna St. (Sabang), Brgy. District 1, Ormoc City buntag sa Agusto 1.
Base sa police blotter, alas 11:05 sa buntag dihang nadawat sa Police Station-1 (PS-1) ang report kabahin sa shooting incident sa nahisgutang lugar. Dali kining girespondihan ug pag abot sa lugar nakit-an nila ang biktima nga si Emily Porcadilla y Capalla alyas “Emyat,” 55 anyos, ukay vendor nga wala nay kinabuhi sa kama didto sa iyang kwarto.
Nakaangkon kini og pinusilan sa lawas, diin ang SOCO nag himo dayon sa pag proceso. Sumala pa nga kalit lang misulod sa balay ang mga armadong suspitsado og pagka human sa hitabo niikyas gamit ang van.
Blanko pa ang kapolisan karon sa pagka ila sa mga suspitsado ug motibo niini. Hinuon, nasayran nga kanhi nalambigit sa kalihukan sa illegal nga drogas og apil sa kategoriya isip High Value Individual (HVI).
Asoy sa police nga samtang gipagawas ang tanang tawo sulod sa balay aron mahan-ay ang pag proceso sa insidenti, may usa ka lalaki sa second floor nga wala manaog og nipakita sa suspityosong lihok. Nag duha duha pa kini pag kooperar sa mando nga manggawas.
Dihang napugos kini pag kanaog nailhan nga si Michael Perez y Basnillo, 33 anyos, olitaw og walay trabaho og molopyo sa Brgy. District 1 gihapon. Atubangan sa saksi nga si Barangay Chairman Nelson Villamor ug sakop sa media gikapkapan siya og nakuhaan sa “large sachet” sa gidudahang shabu nga giputos sa tisyu maong kasuhan si Perez og paglapas sa RA 9165, kon ang Comprehensive Dangerous Drugs Act. Ni Josie Sersena (EV Mail July 31-August 6, 2023 issue)
