ORMOC CITY – Duha ka lalaking biktima sa shooting incident sa manag lahi nga lugar ug adlaw ubos sa jurisdiction sa Police Station 3 (PS-3), samtang pulos pa gipangita ang mga suspitsado sa krimen.
Ang una nahitabo niadtong Mayo 9 mga alas dos sa hapon diin ang biktima giila nga si Rey Romero y Rondina alyas “Joaquin Bordado,” 33 anyos, taga Block 4, Tzu Chi Village, Brgy. Liloan, ning dakbayan.
Ang mga samad sa ulo og sa ubang parti sa lawas ang gikataho nga hinungdan sa kamatayon niini. Sumala pa nga nisulod ang suspek sa House No. 17, nga pinoy-anan sa biktima dayon diritso posil niini.
Samtang sa Sitio Bogo, Brgy. Curva usa ka empleyado sa City Government ang patay gihapon sa pag pamosil, pasado alas sais ang takna sa sayong kagabhion niadtong Mayo 10.
Namatay samtang gi asikaso sa pribadong hospital si Jeffrey Rufino y Naya, 41 anyos, taga Brgy. Domonar, Ormoc City. Sumala pa kanhi kini usa ka Barangay Kagawad sa lugar.
Kauban niya niadtong higayona ang igsuon nga empleyado gihapon sa syudad nga si Johnlo Rufino y Naya, 26 anyos, olitaw ug molopyo gihapon sa Brgy. Domonar. Naigo kini sa likod pero luwas ug nagpa alim na sa pribadong tambalanan.
Blangko pa ang kapolisan sa motibo og sa mga suspitsado sa duha ka krimen. Diin niapilar sila og kooperasyon sa komunidad hilabina sa mga naka saksi aron masolbad na ang kaso og madakpan na ang mga responsabli sa sunod sunod nga insidenti sa pag pamosil. Ni Josie Sersena (EV Mail May 8-14, 2023 issue)
