KANANGA, LEYTE – Onse ka pakete og gibana-bana nga nag kantidad sa twenty thousand pesos (PHP 20,000.00) sa gidudahang illegal nga drogas kon shabu ang nakuha gikan sa suspitsado nga subject sa buy-bust operation niadtong Julyo 12 sa kadlawon, didto sa may San Vicente Extension, Brgy. Poblacion ning lungsod.
Giila ang suspek nga si Joseph Odan, 30 anyos, olitaw og taga Zone 2, Brgy. Natubgan, Kananga, Leyte.
Napalitan siya ug usa ka pakete sa gidudahang shabu balor sa five hundred pesos (PHP 500.00) pinaagi sa police nga poseur-buyer. Nakuha usab gikan kaniya ang buy-bust money.
Taodtaod nang gipanid-an sa autoridad si Odan kinsa matud pa idlas ug maniguro sa iyang baligyaan, apan niadtong higayona mas lihiro ang kapolisan busa siya nasikop. Sagad pod adto sa awa-aw nga dapit himuon ang transaksyon sama sa may Diversion Road padung sa Brgy. Libongao. Tanggong na sya karon sa Kananga Police Station custodial facility ug nag atubang sa kasong paglapas sa RA 9165 o ang Comprehensive Dangerous Drugs Act of 2002. Ni Josie Sersena (EV Mail July 10-16, 2023 issue)
