KANANGA, LEYTE – Tolo ka adlaw nga nag pabilin ang mga SIKAT Scholars sa EDC solod sa pasilidad niini sa KEITECH, Kananga, Leyte.
Julyo 21, natapos ang aktibidad sa 2023 Sikat Solidarity Building ubos sa tema nga “Empowering the youth to elevate regenerative thinking.”
Ang 80 ka mga 3rd year college students gikan pa sa nagka daiyang probinsya sa nasud ubos sa mga lugar nga dunay EDC geothermal sites. Ug gihangop nila ang talagsaong kahigayonan nga personal nilang ma bisita ug masinati ang nahimotangan sa mga planta sa nasangpit nga kompaniya partikular dinhi sa Leyte. Gipa ilawom usab sila sa pagtuon o lecture nga may kalabotan sa kinaiyahan; labaw sa tanan nagka himamat silang mga eskolar sa EDC ubos sa SIKAT.
Nakahinabi ang lima ka mga participants nga nag representar sa lima usab ka mga “sites” diin ilang gi paambit ang kasinatian; ug gipaabot sa EDC ang pag pasalamat sa prebilihiyo nga nahimo silang SIKAT Scholars. Matud nila dili tanan nahatagan sa tsansa nga maka tongha sa kolihiyo ug makab-ot ang pangandoy nga ilang mahaw-as sa kalisod ang ilang pamilya.
Si Robert nga anak og usa ka tricycle driver nagkanayon nga nitaas ang istado sa kinabuhi kay siya palang ang una sa pamilya nga naka eskwela sa college. Si Reynald nga nag trabaho na sa edad nga 10 years old para lang maka tungha sa elementarya. Subo pa gyod huna-hunaon nga namatay ang iyang amahan human sa “moving up” niya sa junior high school, daw sa ni ngitngit ang iyang kaugmaon pero naluwas siya pinaagi sa SIKAT.
Parehas gihapon sila ni Mel og Bea gikan sa Negros nga gitawag nilang “last shot” ang higayon kay kon wala sila mahimong scholars hayan wala na sila makaabot sa edukasyon karon, tungod kay dili sila kayang suportaan sa ilang ginikanan pag eskwela. Si Jinn usab inspirasyon ang amahan nga usa ka welder, busa kursong Mechanical Engineering iyang gikuha. Pulong niya nga sa probinsya nila dili sa tanang adlaw maymagpa trabaho sa iyang amahan, busa blessing nga nahimo syang scholar.
Samtang ang gikan sa host community (Kananga) nga si Ancient nagkanayon nga “God-given opportunity” ang iyang pagka apil sa SIKAT Scholars kay usa lang ka lending collector ang iyang amahan og housewife lang ang iyang inahan. Dugang pa niya nga “ang EDC kay more than just a company, it changes lives,” ug nahatagan sa katumanan ang ilang mga damgo.
Sa kinatibuk-an og sa ngalan sa mga SIKAT Scholars kinasing-kasing nilang gipasalamatan ang Energy Development Corporation sa mga programa nga gitawag og end-to-end, sa pag agak kanila ug pag andam sa usa ka mahayag nga kaugmaon. Ni Josie Sersena (EV Mail July 17-23, 2023 issue)
