ORMOC CITY – Gibana bana nga nitimbang sa 25 gramos ang gidudahang shabu nga nakuha gikan sa suspitsado nga nasikop sa buy-bust operation alas 10:37 sa gabii niadtong Abril 29, sa may Brgy. Danhug ning dakbayan.
Sigun sa autoridad duna kini “standard o street value” nga nag kantidad sa one hundred seventy thousand pesos (PHP 170,000).
Ang subject sa buy-bust operation mao ang High Value Target (HVT) individual nga si Garry Etang, 35 anyos, construction worker, olitaw nga taga Brgy. Danhug ra usab. Napalitan siya og usa ka paketi sa gidudahang shabu ug sa iyang posisyon nakuha ang mga ebidensya diin ang lima ka paketi sa gituhuang shabu gisulod pa sa kaha sa sigarilyo.
Gibasahan siya sa iyang mga katungod nga naka latid sa “Miranda Doctrine.” Ug dihang gi kapkapan nga may presensya sa barangay opisyal og media, nakuha gikan kaniya ang usa ka libo ka pesos (PHP 1,000) nga buy-bust money nga maoy gigamit sa police poseur buyer. Lakip sa narekopo sa operasyon ang cellular phone ug ang single motorcycle nga gisakyan niini.
Ang mga ebidensya, partikular ang gidudahang illegal nga drogas, gidala sa PNP crime laboratory aron ma examine. Gikasuhan na si Etang og pag lapas sa Section 5 ug Section 11, Article II sa Republic Act 9165 o ang Comprehensive Dangerous Drugs Act of 2002. Ang operasyon maoy resulta sa hiniusang pwersa sa OCPS-6, RIU-8, og PNP Drug Enforcement Group Special Operations Unit 8. Ni Josie Sersena (EV Mail May 1-7, 2023 issue)
