MATAG-OB, LEYTE – Wala sila magdahom nga ang naandan nilang kalingawan mao diay hinungdan nga maka estar silag pila ka gabii sa estasyon sa police.
Kini ang nagka hiusang pahayag sa mga nadakpan dihang naabtan sa EV Mail adlawng Dominggo, Oktobre 23. Usa kanila nabalaka kay moabot ang iyang higala nga foreigner og basin dili niya masugat sa Airport.
Gisikop sa Matag-ob Police sila si Maricel Bati-on y Collamat, 28, single; Anabella Collamat y Paceño, 51, single; Roxanne Diaz y Hisim, 28, housewife; Sonia Etable y Dotillos, 39, housewife; ug Gemny Cabalican y Leysa, 35, aircon technician. Pulos sila residenti sa Barangay Bulak, lungsod sa Matag-ob.
Ang panimalay ni Maricel Bati-on maoy lokasyon sa manag silingan nga adto sila mag abot aron mag duwa. Atul sa operasyon nakumpiska ang mga ebidensya sama sa playing cards, bet money (pusta) nga ni total sa PHP 240.
Kasong Violation of Presidential Decree (PD) 1602 – Illegal Gambling ang gipasaka kanila human maaktohi sa autoridad nga nag “Poker Games.”
Matud sa bag-ong Acting Chief of Police (ACOP) nga si Major Arturo Salvacion, Jr. nga pursigido ang kapolisan sa Matag-ob sa kampanya kontra sa mga illegal nga sugal. Gipasalamatan pod niya ang kooperasyon sa katawhan pinaagi sa pag report, parehas sa Brgy. Bulak nga tua na sa sudlonon og bukid ang lugar. Human mapa ilawom sa inquest proceeding sa korte og ma proceso ang mga dokuminto, gitugotan silang maka pyansa alang sa temporaryong kagawasan. Klase-klase man ang ilang rason hilabi na ang giingon nga pag palabay sa oras apan kon may pustahanay “sugal” na kini og gidili na sa balaod, dugang pasabot sa autoridad. Ni Josie Sersena (EV Mail October 24-30, 2022 issue)
