ORMOC CITY – Gidiklara nga Dead on Arrival (DOA) ang usa ka lalaki pag abot sa pribadong tambalanan human nakoryintihan samtang nanangtang sa Christmas lights sa Christmas tree.
Ang insidenti nahitabo sa may rooftop sa Carlosta Hotel, Brgy. Cogon ning dakbayan, mga alas 10:40 sa buntag niadtong Inero 18.
Ang biktima giila nga si Felix Parilla y Rodrigo, 32 anyos, olitaw og regular nga empleyado isip usa ka electrician sa nahisgutang hotel. Lumad kini nga taga Brgy. Ginob-an, Lawaan, Eastern Samar ug temporyong nagpuyo sa Purok 1, Brgy. San Pablo, Ormoc City.
Sa police report sa Police Station 1 nga nadawat nila ang taho pinaagi sa concerned citizen mga alas dies ang takna sa gabii. Ug base sa ilang inisyal nga imbistigasyon nagkanayon nga nagtang tang si Parilla sa mga dekorasyon partikular sa Christmas lights (Christmas tree) sa pinaka ibabaw nga atop sa Carlosta Hotel, diin kauban ang laing regular nga empleyado nga si Christian Pitogo, 32 anyos. Apan kalit lang aksidinting nakoryintihan sa live wire hinungdan sa hinanali niining kamatayon. Bisan pa man nga dali kining nadala sa Ormoc Doctors Hospital apan nakabsan na ang biktima sa kinabuhi pag abot sa tambalanan. Ni Josie Sersena (EV Mail January 16-22, 2023 issue)
