ORMOC CITY – “Tabangay ta, walay politika dinhi,” mensahi ni SP Member Caren Torres-Rama, Chairperson sa Komitiba sa Social Services, kinsa nirepresentar sa Ormoc City LGU atul sa pag payout sa financial assistance didto sa Brgy. Danao niadtong Junyo 20, usa ka adlaw una mag usa ka simana sukad nahitabo ang sunog.
Dugang pa niya nga lisod man ang estado nila karon sa mga nasunogan apan lakip kini sa mga pag suway; maayo nalang kay walay kinabuhi nga nakalas. Angay usab pasalamatan ang mga nihatag og hinabang sa mga biktima nga gihimomong instrumento sa Ginoo.
Gani niadtong higayona matag panimalay (household) naka dawat og tag five thousand pesos (PHP 5,000.00) sa paningkamot sa Tingog Partylist ubos kang Representative Yedda Marie Romualdez og Congressman Jude Acidre kauban ni House Speaker Ferdinand Martin Romualdez. Mismong ang team gikan sa DSWD Satellite Office pinangunahan ni Ms. Raquel Moralde ang nag administer sa distribusyon para sa mga benepisyaryo.
Gawas sa maong financial assistance niadtong adlawa, may nadawat pa ang mga biktima sa family og home kits ingon man relief packs ug uban pa. Nasayran nga may nadawat na ang biktima nga financial assistance sa tag PHP 10,000.00 pinaagi sa DSWD.
Ang coordinator sa Fourth District nga si Ma. Liza Gelig maoy nitambong inubanan sa mga staff sa Alagang Tingog Center, ug niingon siya “molihok as one” agig pag sanong sa giluwatan sa mga namulong. Gipasabot niya nga ang mga programa sa Tingog Partylist alang sa mga nanginahanglan, serbisyohan sa walay pag pili.
Didto usab nisaksi og nihatag sa mensahi sa paglaum si CLGOO Jean Redi Briones kinsa nagkanayon nga naa ang gobierno naglantaw kanila ug andam motabang. Ingon man usab ang bag-ong labaw sa CSWDO nga si Ms. Jovie Ares nga maoy nag dumala og tua gyud sa lugar aron mag atiman sa mga panginahanglan sa mga nasunogan.
Samtang si Kapitan Richard Impas nibutyag nga naa nay gi plano nga housing project nga paga tukoron diha sa barangay site. Napalit ang lote sa barangay og ang mga balay orihinal kining gigahin alang sa mga biktima sa linog niadtong 2017. Pero dili ang tanang nasunogan karon apil sa original nga beneficiaries; sanglit dili tanan nga nag puyo sa maong Tzu Chi Village biktima sa nilabay nga linog, apan paninguhaon nila nga maapil sila sa nahisgutang housing project.Dihang nakahinabi kanhi ang tinugyanan sa Tzu Chi Foundation gika subo nila ang gidangatan sa mga nasunogan, ug nagkanayon nga mag dependi sa ilang kadagkuan kon mahimoan og utro nga housing units ang 65 ka mga nasunog nga balay. Ni Josie Sersena (EV Mail June 19-25, 2023 issue)
