ORMOC CITY – Ang simpling traffic violation og walay helmet ra unta pinasikad sa “Oplan Sita”, nahug na ginokoray batok sa duha ka lalaki nga magka angkasay sa single motorcycle.
Ang insidenti nahitabo niadtong Septiembre 3 mga alas 6:20 sa gabii dapit sa National Highway sakop sa Sitio Tinag-an, Brgy. Ipil ning syudad.
Arestado sa taga Police Station-6 sila si Mark Acosta y Recto (driver), 27 anyos, minyo, ug Rolando Baer y Requioma (angkas), 37 anyos, olitaw, polos taga lungsod sa Hilongos ang gitug-ang adress. Tanggong pa sila karon sa kustodiya sa Police Station-6 human ma file ang kaso kontra Illegal Possession of Firearms (RA 10591).
Sa taho gikan sa estasyon sa polisya nga nag pahigayon ang personnel sa mobile patrol dihang nakita nila ang nag motor nga walay helmet ang angkas. Dihang gipara, imbis momenor nisutoy hinuon pag padagan, hinungdan nga gigokod kini sa patrol.
Dihang naapsan og gipangayoan sa dokumento sama sa lisensya og rehistro sa motorsiklo, walay gikapakita. Namatikdan usab nga kadudahan ang mga lihok sa duha ka lalaki. Gipa taas ang ilang sinina og nakita ang calibre 45 nga naka soksok sa tagsa-tagsa nila ka hawak.
Ning higayona niresponde na sa area ang ubang police personnel sa pag panguna ni PLT Beverly Ann Barredo ug ang alert team sa Ormoc City Mobile Force Company (OCMFC).
Sa dugang pag beripika, pakyas sila pag presentar sa mga dokumento sama sa lisensya og “permit to possess” og “carry”. Ang duha ka armas parihong may mga sulod nga buhing bala.
Si Acosta nakuhaan sad og kwarta sa kantidad nga kapin sa twenty six thousand pesos (Php 26,645), samtang si Baer may six thousand five hundred pesos (Php 6,500). Bisan pa sa mga ebedinsya tak-om pa gihapon ang mga suspitsado sa ubang detalyi, kon nganu duna sila niini nga mga armas. Nasang-at na ang kaso sa Korte batok sa mga suspitsado. Ni Josie Sersena (EV Mail September 5-11, 2022 issue)
