MATAG-OB, LEYTE – Arestado ang naka lista nga Top two “Most Wanted Person” (Municipal Level) nga si Antonio Pantano y Laureño, 77 anyos, mag uuma nga residenti sa Sitio Capi-on, Brgy. San Sebastian, lungsod sa Matag-ob.
Nasikop siya mga alas 2:15 sa hapon niadtong Nobiembre 2, 2022 didto sa Brgy. Damulaan, Albuera, Leyte. Armado ang kapolisan sa Warrant of Arrest sa kasong homicide nga naka dokit sa Criminal Case No. R-ORM-22-00725-CR nga giisyu niadtong Octobre 28, 2022 ni Hon. Maria Corazon Vergara-Naraja, Presiding Judge, RTC 47, Ormoc City.
Hinuon gitugotan ang akusado nga maka pyansa og PHP 120,000.00 alang sa iyang temporaryong kagawasan. Ang joint elements sa Matag-ob Municipal Police Station (MMPS) gipangulohan ni PMAJ Arturo A. Salvacion, Jr., ACOP, kauban ang CIDG-8 Northern Leyte PFU ubos kang PLTCOL Norman Patnaan, ug Ormoc City Mobile Force Company ubos kang PLT COL Joel Camacho og may koordinasyon usab sa Albuera Municipal Police Station.
Gipasabot si Pantano sa rason nganung gidakop siya og gisultian sa iyang katungod diha sa gitawag nga Miranda Doctrine sa Republic Act 7438 og 9745; dayon gidala sa estasyon sa Matag-ob diin siya gi tanggong.
Mahinomduman nga nalambigit ang akusado sa stabbing and hacking incident niadtong gabii sa Augosto 6 ning tuiga, didto sa Sitio Capi-on, Brgy. San Sebastian, Matag-ob, Leyte. Napatay niya ang biktima nga si Antonio Damayo y Abarial, 74 anyos, nga iyang silingan og kumpari. Nag inom ang suspek og ang biktima niadtong higayona; dihang nagka lalis hangtod nga ni resulta sa tinigbasay og pag pang dunggab.
Sundang nga 17 inches ang gitas-on ang gigamit, diin na rekober, sa posisyon sa suspek nga si Pantano, sumala pa sa spot report sa MMPS niadtong higayona. Pero samaran pod si Pantano niadtong higayona sanglit natigbasan usab siya ni Damayo. Sa kinatibuk-an gipasalamatan sa liderato sa Matag-ob Police ang ilang intelligence personnel og ang sibilyan nga nitog-an sa nahisgutang gitagaon sa akusado. Ni Josie Sersena (EV Mail November 7-13, 2022 issue)
