ORMOC CITY – Duha ka lalaki ang nasikop sa anti-illegal drugs operation sulod sa hurisdiksyon sa Ormoc City Police Office (OCPO) sa duha ka magka sunod nga adlaw.
Una mao ang buy-bust operation nga gilunsad sa autoridad pinangunahan sa personnel sa Police Station 3 (PS-3) ubos kang PCapt. Omar Roel Cartalla nga ni resulta sa pagka sikop sa ginganlan og Richard Hermosilla, 40 anyos, manindahay og utanon, residenti sa NHA Housing, Brgy. Margen ning syudad. Didto siya madakpi sa may Sitio San Roque, Brgy. Liloan niadtong Inero 4, 2023 sa alas 10:00 sa gabii.
Napalitan ang suspek ug usa ka gamay nga paketi sa gidudahang shabu balor og usa ka libo ka pesos (PHP 1,000.00) pinaagi sa poseur buyer nga usa ka police. Dihang gikapkapan ang lawas, nakuha sa iyang posisyon ang usa ka libo ka pesos (PHP 1,000.00) nga buy-bust money og laing usa pa ka paketi sa gidudahang shabu.
Samtang pagka Inero 5, 2023 mga alas 11:00 sa gabii didto sa highway sa Purok 7, Brgy. Luna nasikop si Francisco Con-ui y Caberte, 33 anyos, nag trabaho sa printing press og taga Barangay District 9, Ormoc City. Si Pat. Diober Otero ang poseur buyer nga nakapalit kaniya ug usa ka paketi sa gidudahang shabu sa kantidad nga one thousand pesos (PHP 1,000.00).
Dihang girikisa ang suspek nakuha sa iyang posisyon ang duha ka selyado nga paketi sa maong illegal nga drugas ug ang buy-bust money nga PHP 1,000.00; ingon man usab ang cash nga kapin sa four hundred pesos (PHP 400.00).
Resulta kini sa hiniusang pwersa nga nakig koordinasyon sa PDEA, kauban ang SDET sa PS-5 sa pagpanguna ni PCapt. Rodolfo Mercolita ug taga PS-1, CIT Ormoc-RIU8, CIU, CDEU og uban pa. Ang duha ka suspitsado na tanggong pa karon sa pasilidad sa nahisgutang mga estasyon human gipasaka ang ang kasong paglapas sa Sec. 5 ug Sec. 11, Article 11 sa RA 9165 o ang Comprehensive Dangerous Drugs Act of 2002 as amended by RA 10640. Ni Josie Sersena (EV Mail January 9-15, 2023 issue)
