ORMOC CITY – Nahiagum sa pag pamosil ang duha ka opisyal sa Barangay Catmon ning dakbayan, didto mismo sa nahisgutang lugar niadtong Pebrero 16, Biernes sa gabii mga alas siete ang takna kapin kon kulang.
Ang mga biktima mao si Kapitan Patricio Laude, kinsa diha diha dayon nakalas ang kinabuhi, samtang ang usa mao si Kagawad Christopher Casimong, nga naangol ug gidala sa tambalanan sa syudad.
Sumala sa kasayoran, didto ang si Kapitan sa balay sa Kagawad dihang kalit lang may wala mailhing tawo ang nipusil kanila. Naabtan na sa niresponding mga pulis si Kapitan Laude nga nagbuy-od sa gawas.
Gilunsad dayon sa tanang estasyun sa Ormoc City Police Office sa gitawag nga “dragnet operation” ug nag montar og mga checkpoints alang sa posibling pagka sikop sa mga responsabli. Apan wala pa nasakoti ang mga suspek niadtong higayona.
Ning pag balita padayon pa ang imbistigasyon kalabot sa pag ila sa mga suspitsado ingon man sa motibo sa maong krimen. Si Laude ang bag-ong ni daog pagka Kapitan niadtong barangay election sa Nobiembre sa nilabay nga tuig. Ni Josie Sersena (EV Mail Feb. 5-11, 2024 issue)
