KANANGA, LEYTE – Niluwat og ultimatum si Kananga Mayor Matt Torres kalabot sa mga mogamit labi na kadtong namaligya sa illegal nga drogas sa lungsod.
Matud niini nga hugot ang kampanya sa lungsod kaabag ang lokal nga kapolisan. Kon “outsider” dili na mosalga pa sa Kananga og kon residenti man mas maayo mokagiw nalang kay sikopon gyod sila sa balaod.
Sama sa usa ka construction worker nga nadakop human na palitan sa gidudahang illegal nga drogas og nagpabilin pa karon sa kustodiya sa PDEG, SOU-8. Ang suspek mao si Erwin Nocellas Estrera, 48, minyo nga taga Brgy. Kawayan, ning lungsod.
Nasikop siya mga alas 6:35 sa buntag sa Deciembre 12 pinaagi sa buy-bust operation nga gilunsad sa highway sakop sa Brgy. Libongao, Kananga, Leyte. Ang operatiba nag langkob sa SOU-8 PNP-DEG kauban ang personnel sa Kananga Municipal Police Station.
Gihanyagan sa suspek ang police poseur buyer sa gituhuang shabu sa kantidad nga mil kinyentos pesos (PHP 1,500). Sa imbentaryo nakompiska gikan sa posisyon sa suspek ang pito ka sachet sa gidudahang illegal nga drogas diin ang usa niini maoy gipalit sa police (subject of sale). Ingon man ang cellphone og ang tolo ka tag kinyentos pesos (PHP 500.00) nga buy-bust money.
Nitimbang sa 60 gramos kapin kon kulang ang nakompiska nga illegal nga drogas nga gibana-bana kining nag kantidad sa PHP 408,000.00. Ang site inspection gipahigayon ni PCPT James Mark Ruiz, ACOP, Kananga MPS, og gimarkahan ang mga ebidensya atubangan sa representanti sa media og opisyal sa Brgy. Libongao. Kasong pag lapas sa Section 5 ug Section 11 sa RA 9165 ang giatubang sa suspek nga natanggong pa hangtod ning pag balita. Ni Josie Sersena (EV Mail Dec. 26, 2022-Jan. 1, 2023 issue)
